Pryderu am y drafnidiaeth ychwanegol ar ffordd brysur dros ben oedd y prif reswm dros wrthwynebiad rhai i ysgol gyfun newydd ar safle Garth Olwg, Pentre'r Eglwys.
   Roedd Neuadd Carnegie, Pentre'r Eglwys yn orlawn ar gyfer y cyfarfod cyhoeddus yng nghanol mis Medi ar gyfer ymgynghoriad gan Gyngor Sir Rhondda Cynon Taf a rhoddwyd cyfle i gefnogwyr a gwrthwynebwyr y cynllun ddweud eu barn. Cadeiriwyd y cyfarfod yn deg a chadarn gan Gyfarwyddwr Addysg y Sir, Dewi Jones, a chafwyd atebion i dros 30 o gwestiynau gan bobl leol a fu'n gweld y cynlluniau a'r dogfennau dros y deuddydd blaenorol.
   Roedd rhai yn anfodlon fod offer cyfieithu yn cael ei ddefnyddio i alluogi pobl i siarad yn Gymraeg neu Saesneg. Ond y prif gwyn oedd nad oes sicrwydd y bydd Ffordd Osgoi Pentre'r Eglwys yn barod erbyn i'r ysgol newydd agor yn 2004.
    Fe ddangoswyd cefnogaeth i'r cynllun gan nifer o'r neuadd yn arbennig gan un o famau ifanc yr ardal oedd yn gofyn pam fod rhai pobol yn anfodlon i ddarparu cyfleusterau gwell ar gyfer addysg drwy gyfrwng y Gymraeg. Bydd y cynllun newydd yn cynnwys ysgolion meithrin Cymraeg a Saesneg yn ogystal ag adeiladau newydd ar gyfer Ysgol Gynradd Garth Olwg ac Ysgol Gyfun Rhydfelen. Mae'n gynllun cyffrous fydd yn dod â nifer o fanteision i'r ardal ac roedd presenoldeb gymaint o rieni Garth Olwg yn y cyfarfod yn dangos cefnogaeth i gynlluniau'r awdurdod.

Ydych chi'n cofio'r penawdau cyntaf yn rhifyn Hydref 1985? Wel mae atgof o'r papur hwnnw ar dudalen 18.
   Yn rhyfeddol mae'r papur bro yn parhau yn llawn o fywyd a datblygiad yr ardal. Mae'n dibynnu ar lu o ohebwyr trylwyr a chyson a llawer o ddosbarthwyr sy'n sicrhau ei fod yn cyrraedd eich drws.
   Ond fel pob papur sy'n datblygu mae angen syniadau newydd a chefnogaeth ymarferol. Os allwch helpu mewn unrhyw ffordd cysylltwch â mi: Penri Williams 029 20890040.