Penblwydd Hapus
Gwell hwyr na hwyrach! Dathlodd Thelma Jones, 14 Cefn Bychan   ei phenblwydd  yn 90 oed ar ddiwrnod 'Dolig. Bu Thelma i ffwrdd yn yr Alban dros ei phenblwydd yn aros gyda'i theulu, ond trefnwyd partion ar ei chyfer yn y Mission Hall ar ei dychwelyd ac yna yng Ngwesty Ansawdd ar y 27ain o Ionawr. Gobeithio i chi fwynhau'r dathlu, a phob dymuniad da i chi oddi wrth eich ffrindiau lu ym Mhentyrch.

Neuadd y Pentref
Ar  Nos Wener 6ed o Ebrill, mi fydd y neuadd yn dathlu ei phenblwydd yn 25. Mae 'na gyngerdd wedi ei threfnu gyda Côr Meibion Pendyrus yn cymeryd rhan. Trefnwyd y noson gan ei bod hi'n debyg bu'r côr yn y gyngerdd agoriadol 25 mlynedd yn ôl, ac yn y dathliadau yn 10 mlwydd oed. Dwi'n siwr fydd galw mawr ar y tocynnau. Os oes awydd arnoch ddod i'r noson, mae'r tocynnau yn £5 yr un, ac mi fyddant ar werth yn siop Follis cyn bo hir, neu ar gael o aelodau'r pwyllgor.

Merched y Wawr
Yn ein cyfarfod misol Mis Chwefror, trefnwyd noson yng nghartref Anne Hughes, Heol y Parc, i godi arian i'r Urdd. Cafwyd noson lwyddiannus wrth i ni fwynhau noson o gaws a gwin, prynu o'r bwrdd coch(gan iddi ddigwydd fod yn Noson San Ffolant), a cheisio dyfalu pwy oedd y priodfab a'r priodferch yn y lluniau priodas ! Codwyd dros £200            yn ystod y nosweth.
   Ein diolch mwyaf i Anne am gynnal y noswaith yn ei chartref, ac i Gareth a'r plant am ddodi fyny gyda tua 30 o fenywod yn eu ty!

Noson y Teulu
Daeth criw o blant brwdfrydig ac oedolion llai heini i'r noson a gynhaliwyd gan Glwb y Dwrlyn yn Ysgol Creigiau ar 9ed Chwefror. Diolch arbennig i Dewi Hughes am drefnu gêmau'r plant ac i Peter Griffiths am alw'r Twmpath Dawns.

Techniquest
Aeth Dosbarth 5 i Techniquest. Aethom ni i'r blanedfa i ddysgu am y gofod cyn llenwi'n Cardiau Teithio gyda gwaith yn y neuadd arddangosfa.

Pêl rwyd 
Chwaraeodd dau dîm Ysgol Creigiau yn erbyn Radur. Roedd y sgôr yn gyfartal i Flwyddyn 5, 0-0. Sgôr Blwyddyn 6 oedd 1-0 i Radur ond roedd pawb wedi chwarae'n dda.

Rosfa a Plwmbo
Daeth Rosfa a'i ffrind Plwmbo i wneud sioe hud o flaen yr Adran Gymraeg a'r Feithrin ac roedd pawb wrth eu boddau y plant bach, y plant mawr a'r `plant hþn!"

Taith Biwt a Bro
Daeth dau fasgot eisteddfod yr Urdd i Ysgol Creigiau i ddangos beth rydych yn gallu gwneud yn yr eisteddfod gan ei bod yn dod i Gaerdydd eleni. Roedd plant yr Adran Saesneg wrth eu boddau gyda'r sioe ddwyieithog ac fe ddysgodd pawb o'r ddwy Adran rywbeth newydd am yr eisteddfod. Gwych!

Croeso
Croeso nôl i Mr Williams a hwyl fawr i Mr Davies. Diolch yn fawr am yr holl waith caled.

Cyngerdd Christian
Roedd hi'n fraint i Gôr yr Ysgol gael cymryd rhan yng Nghyngerdd
Christian yn Eglwys Gadeiriol Llandaf. Roedd yn gyngerdd arbennig a braf oedd clywed Katie'n canu eto. Codwyd llawer o arian i Sefydliad y Galon er cof am Christian.

Tocynnau Cyfrifiadur Tesco
Rydym yn casglu tocynnau i gael offer cyfrifiadur
i'r ysgol felly os ydych yn siopa yn Tesco, cofiwch amdanom.

Gwellhad Buan
Dymunwn wellhad buan i Mari Elin, Penmaes, sydd wedi bod yn Ysbyty Singleton, Abertawe am gyfnod yn dilyn ymweliad â De Affrica.

Sgio
Unwaith eto eleni aeth criw brwdfrydig o aelodau Clwb y Dwrlyn i sgio i Kitzbuhel, Awstria. Efallai nad yw eu cyflymdra yn agosau i raswyr lawr rhiw yr enwog Hahnenkamm ond roedd rhai wedi ceisio ei goncro er ei fod mor serth.