Gyda dim ond wythnosau i fynd tan ðyl ieuenctid fwyaf Ewrop, mae 400 o ddisgyblion ysgol yng Nghaerdydd a'r Fro wrthi'n rhoi'r sglein ar uchafbwynt adloniant nos Eisteddfod Genedlaethol yr Urdd 2002.
   Gwledd gerddorol ydi Syniad Sam sy'n siwr o godi'r to yn Neuadd Dewi Sant yn ystod wythnos yr Eisteddfod. Yn gymysgedd liwgar a llawn egni o gerddoriaeth a dawns, gyda chast anferth o ddisgyblion rhwng 9 ac 11 oed ysgolion cyfrwng Cymraeg Caerdydd a Bro Morgannwg, bydd Syniad Sam yn gyfle gwych i bawb weld talent ifanc yr ardal.
   Meddai Siân Eirian cyfarwyddwr yr Eisteddfod a'r Celfyddydau: "Stori cwbl wreiddiol ydi hon, ar y thema gyfoes a chyffrous o deithio'r gofod, sydd wedi tanio dychymyg a brwdfrydedd y plant i gyd. Rydyn ni'n ffodus ein bod wedi llwyddo i ddenu talentau fel Ffion Harries i sgrifennu'r geiriau a Geraint Cynan i gyfansoddi'r gerddoriaeth. Ac mae Gwawr Dafis, y cyfarwyddwr, yn llwyddo i gael perfformiad eu bywydau allan o'r prif gast o 100, a'r corws o 300. Tipyn o gamp, yn wir!"
   Noddir Syniad Sam gan Gronfa Loteri Cyngor Celfyddydau Cymru, a bydd y sioe yn cael ei llwyfannau am dair noson, o nos Lun i nos Fercher 3-5 Mehefin. "Yn nhraddodiad gorau sioeau cerdd Eisteddfod yr Urdd", ychwanegodd Siân Eirian, "mae'n siwr o adael cryn argraff. Rwy'n siwr bydd y profiad yn anfon ein cynulleidfaoedd allan yn hymian ac yn danwnsio!"

Enillodd Rhys Davies, Blwyddyn12, Ysgol Gyfun Llanhari wobr arbennig yn ddiweddar oddi wrth WWF, y rhwydwaith amgylcheddol byd-eang, am brosiect arloesol sy'n ymdrin â chynaladwyedd.  Daeth gwaith Rhys i'r brig am ei gynllun i gynhyrchu sioe fawreddog ar thema cynadladwyedd i'w berfformio

mewn ysgolion lleol ac i'w recordio ar fideo ar gyfer ei ddefnyddio gan eraill.
   Fel rhan o'i wobr bydd Rhys yn un o bedwar a fydd yn ymuno ag arweinwyr y byd i drafod dyfodol ein planed yn un o ddigwyddiadau pwysicaf y flwyddyn--yr Uwch-Gynhadledd Cynaladwy yn Johannesburg De Affrica ddiwedd Awst a dechrau Medi eleni.