Mae'r cwmni sydd am ail-adeiladu rhan o ardal siopa Pontypridd wedi rhoi cais cynllunio newydd i mewn i Gyngor Sir Rhondda Cynon Taf. Yn y cais newydd bydd nifer o siopau ar Rhodfa Angharad yn edrych allan dros yr afon a bydd dwy bont yn cysylltu'r datblygiad gyda maes parcio newydd.
   Wrth gerdded i lawr Stryd y Taf mae'n amlwg fod angen adnewyddu'r dref a rhoi ffocws newydd i'r siopa. Mae cynlluniau cwmni Teesland wedi eu newid yn dilyn cyfnod o ymgynghori cyhoeddus y llynedd ac maent yn cynnwys nifer o syniadau a grybwyllwyd gan y cyhoedd.
   Bydd y datblygiad newydd yn creu 1,800 o swyddi gyda dros 100 yn ystod y cyfnod adeiladu. Mae lle i 46 o siopau ac archfarchnad Sainsbury's a swyddfeydd yn y datblygiad £45m.
   Bydd y cais yn cael ei ystyried gan Gyngor Sir Rhondda Cynon Taf gan ddisgwyl ymateb erbyn yr Hydref. Yn barod mae pobl yn troi o Bontypridd i Gaerdydd, Caerffili a Merthyr i wneud eu siopa. Os na wneir rhywbeth yn fuan ni fydd dyfodol i'r dref fel canolfan bwysig i'r cymoedd.