Roedd Neuadd y Miwni yn orlawn a'r tenswin yn uchel wrth i'r dorf edrych ymlaen at uchafbwynt cystadleuaeth Popio i bobl ifanc Rhondda Cynon Taf. Daeth chwech drwodd i'r rownd derfynol, tair o ysgol Rhydywaun, dau o Rydfelen ac un o'r Cymer.
   Cyflwynwyd y noson gan Elen a Rhydian o S4C ac yn dilyn agoriad trawiadol gan y grwp Trysor dechreuodd y cystadlu o ddifri. Roedd rhaid i bob cystadleuydd ganu dwy gân gyferbyniol a chafwyd amrywiaeth o ganeuon gyda cherddoriaeth cefndir a dawnswyr. Ymhlith yr uchafbwyntiau roedd perfformiad Menna o Black Velvet , Jeni o Camau'n Nesau, Jessica o Sut Fedrai i Fyw ac wrth gwrs Alun gyda'i berfformaid  ysgubol o Mac y Gyllell.
   Cafwyd barn y beirniad o'r sofa, Branwen Gwyn a Ieuan Rhys, ac yna cyfle i'r holl gynulleidfa bleidleisio am ei hoff berfformiwr.
   Yn fuddugol roedd Alun Cowles o Ysgol Rhydfelen sydd yn astudio celf a drama at Lefel A ac yn mwynhau pob eiliad o berfformio.
   Llongyfarchiadau i griw Cic fu'n trefnu'r noson ac yn arbennig i Angela Gould, Martyn Geraint a Dawn Williams am sicrhau gwledd o dalent ifanc newydd.

Yn dilyn ei daith i Gynhadledd y Byd yn Johannesburg mae Rhys Richardson o Ysgol Gyfun Llanhari wedi cael gwahodiad i fynd i Fwlgaria i drafod ei brofiadau gyda 60 o bobl ifanc o bob rhan o Ewrop.
   Roedd ei ymweliad â thref 'shanti' Johannesburg a Lesotho wedi cael argraff ddofn arno. Bydd ei ymweliad â Bwlgaria yn gyfle pellach i drafod datblygu cynaladwy. 

Bydd prynhawn agored a dawns fawreddog wrth i Ysgol Gyfun Rhydfelen ddathlu 40 mlynedd ar Hydref 12ed. Efallai mai hwn fydd y tro olaf i weld yr adeiladau hynafol a fu'n gartref i'r ysgol cyn iddi symud i'r safle newydd ym Mhentre'r Eglwys.