Taith rygbi ysgolion  i Dde Affrig

Dim Band-eang
ym Mhentyrch


Tra fod y rhan fwyaf o ardal Taf-Elái erbyn hyn yn derbyn gwasanaeth Broadband mae BT wedi gwrthod  â darparu'r gwasanaeth i gyfnewidfeydd Pentyrch a Ffynnon Taf. Mae hyn yn effeithio ar fusnesau nifer fawr o bobl yn yr ardal.
   Y gred hyd nes yn ddiweddar oedd y byddai cyfnewidfa Pentyrch yn cael gwasnaeth broadband unwaith y daeth y nifer oedd yn gofyn amdano wedi cyrraedd 200 o bobl ac erbyn yr haf eleni roedd dros 250 wedi cofrestru. Ond yn sydyn penderfynodd BT newid y darged a gosod isafswm o 500 ar gyfnewidfa Pentyrch sy'n gwasanaethu Rhydlafar, Pentyrch, Creigiau a Groesfaen.
   Cred trigolion yr ardal eu bod yn cael eu trin yn annheg a bu llythyru cyson rhwng y Cyngor lleol, Aelodau'r Cynulliad ac Aelodau Seneddol gyda BT i geisio eu darbwyllo i weithredu.  Mae'r darged yn llawer uwch na'r disgwyl o ystyried maint y gyfnewidfa.
  Mae diffyg gwasanaeth Band-eang ym Mhentyrch yn effeithio ar nifer o fusnesau'r ardal sy'n defnyddio'r rhyngrwyd i gysylltu gyda cleientiaid dros y byd. Nawr mae ymgyrch wedi cychwyn i ddarbwyllo BT i newid eu targed ac i gynddu'r nifer sy'n gofyn amdano. Erbyn hyn mae dros 300 wedi cofrestru ac mae BT yn parhau i wrthod gweithredu.

Fel aelod o garfan tîm rygbi ysgolion Caerdydd, bum yn ddigon ffodus i gael mynd ar daith rygbi i Dde Affrig yn ystod yr haf. Taith i ddathlu can-mlwyddiant y garfan oedd hon, ac roedd hi wir yn daith gofiadwy.
   Aethpwyd â dau dîm allan yno. Enillodd yr ail dîm dair gêm allan o bump ac enillodd y tîm cyntaf un o'u pump gêm. Cawsom brofiadau diddorol dros ben - mynd ar saffari gyda'r nos, ar noson oer iawn! Gwelsom lawer o fywyd gwyllt, yn llewod ac eliffantod, jiraffs a mwy. Gwelsom gêm rygbi rhyngwladol rhwng De Affrig a Seland Newydd a phrofi awyrgylch arbennig iawn yno. Buom yn Sun City, buom hefyd i ben Table Mountain ac o'r copa cawsom olygfeydd gwych o Johannesburg a Robben Island.
   Fe deithion ni i Robben Island a chael ein tywys o gwmpas y carchar lle y bu Nelson Mandela yn gaeth cyhyd. Ymwelon â'r union gell lle y bu'n garcharor. Taith i'w chofio, profiadau i'w trysori.

Gethin Davies
Creigiau

AGOR MEITHRINFA NEWYDD


Mae Mudiad Ysgolion Meithrin wedi agor Meithrinfa newydd i 30 o blant yn Abercynon. Adeiladwyd y feithrinfa, Y Gorlan, gan awdurdod Rhondda Cynon Tâf gydag arian y Cynulliad mewn lleoliad cyfleus iawn nepell o'r A470.
   Mudiad Ysgolion Meithrin fydd yn rheoli'r feithrinfa, gan gynnig gofal ac addysg o ansawdd gan dîm o staff hapus, cymwys, Cymraeg eu hiaith. Mae'r Gorlan yn cynnig gofal dydd i blant o chwech wythnos hyd at oed ysgol rhwng 8yb a 6yh o ddydd Llun i ddydd Gwener gydol y flwyddyn. Mae gan y feithrinfa bartneriaeth agos gydag Ysgol Gynradd Gymraeg Abercynon, gan fod yr uned o dan 5 yn yr un adeilad. Am wybodaeth pellach am Y Gorlan ffoniwch 01443 741630.

Tudalen Nesaf >>