Cylch Meithrin Sardis.
Pob hwyl i'r plant sydd yn gadael ac yn dechrau Ysgol Gymraeg Evan James ym Mis Medi. Diolch i staff y feithrin am eu gofal a'u gwaith caled yn ystod y flwyddyn.
Bydd rhai newidiadau ym Mis Medi. Mae'r Ysgol Feithrin yn parhau ar agor yn y bore ond oherwydd eu phoblogrwydd bydd sesiynau'r prynhawn yn dechrau. Os oes diddordeb, cysylltwch yn syth er mwyn sicrhau lle. Bydd "Ti a Fi" yn cael ei chynnal prynhawn dydd Llun -1.30y.p. i 3.00.y.p.- o fis Medi ymlaen. Croeso i bawb.

Babi Newydd.
Llongyfarchiadau i Geraint ac Emma, Lanwood Road, Graigwen ar enedigaeth merch fach, Mirain Alaw. Nith gyntaf i Aled Thomas , Lan Close a Menna Thomas , Efail Isaf.

Ysgol Maesycoed
Llongyfarchiadau i dîm pêl-rwyd yr ysgol ar ennill Pencampwriaeth Pêl -rwyd Ysgolion Cynradd Yr Urdd yn Aberystwyth yn ddiweddar. Fe guron nhw Ysgol Malborough Road, Caerdydd yn y rownd derfynol. Enillon nhw y gystadleuaeth hon ddwy flynedd yn ôl hefyd. Diolch i'w hyfforddwraig Andrea Cooper.

Clwb y Bont.
Yr Eisteddfod Dafarn
20.06. 2003.
Ugain mlwydd oed ond mae ysbryd yr hen glwb yn ifanc o hyd. Cafwyd llond bol o fyrgyrs yn y Barbiciw ac yna llond bar o hwyl yn Eisteddfod Dafarn Clwb y Bont. O "Stori wir " Cliff Hewitt am yr Eidalwr sy'n ceisio dwyn ein defaid i "Boogie Woogie " blewog Lyn, roedd 'na gyffro, chwys a thensiwn wrth i dîm Y Bont herio tîm Y Pridd.
   Roedd uchafbwynt cynnar yn yr adrodd i ddysgwyr wrth i Dave y Gwyddel, dysgwr amhrofiadol iawn, ddod i'r brig. Ei angerdd yn fwy na'i ynganiad blesiodd y beirniad, Gwyn Griffiths. Yng ngheg Dave trodd

"blodau hardd " yn "bloody hard"!! Tîm y Bont aeth a'r ras yfed ar ôl glynu at eiriad rhestr y testunau -yfed 5 peint o unrhywbeth oedd yr her. Roedd gwydrau'r Pontwyr yn llawn o ddwr a sgwosh tra bod alcis tim y Pridd yn llowcio HB Pat!
   Roedd cystadleuaeth y côr yn agos - a llawer o gwsmeriaid y clwb, heb son am drigolion Maesycoed yn difaru eu bod nhw mor agos wrth i'r tîmau gweiddi canu ail bennill "Delilah". I Dîm y Pridd rhoddodd Wil Morus Jones y marc cyn iddo orfod adael ar frys (doedd hyn ddim byd i wneud a'r canu na byrgyrs y barbiciw, gyda llaw!)
   Fe fyddai Charles Saatchi a'n Haelod Seneddol lleol wedi eu cyffroi o weld y celfyddyd gafodd ei greu o bapur newydd a'r darluniau manwl o'r Clwb. Roedd gan y ddau dîm 6 phwynt yr un wrth ddod at y rownd olaf - y rownd agored. Osian Llywelyn o dim y Bont a'i olygfa o "C'mon Midffild" a Lyn Rees ar y piano o dîm Y Pridd fu'n ymrafael am y marc olaf holl bwysig. Ond ar ôl dau berfformiad llawn hiwmor, acenion rhyfedd a blew o bob rhan o'r corff doedd na ddin modd i'r beirniad rhannu'r tîmau a gorffennodd yr Eisteddfod yn gyfartal. Doedd na ddim coroni, doedd na ddim cadeirio ond roedd digon o hwyl. Mae'r clwb yn ddiolchgar iawn i'r beirniaid , Wil Morus Jones a Gwyn Griffiths am wneud gwaith cystal (er gwaetha'r ymdrechion i'w llwgrwobrwyo), Kevin Nefyn am goginio, ac i Anthony Rhys am drefnu'r eisteddfod.

   Ry'n ni'n ddiolchgar hefyd i Gôr Godre'r Garth ddaeth draw i'r clwb ar y nos Sadwrn i ddiddanu yn ystod y noson lawen ac i Anthony Evans am arwain y noson. Mae'r clwb yn dymuno pob hwyl i'r côr wrth iddynt baratoi at yr Eisteddfod ym Meifod.
Fe fydd rhagor o ddigwyddiadau yn yr haf i ddathlu pen blwydd y clwb yn 20 oed a fydd yn arwain at y noson gyda Dafydd Iwan ym Mis Hydref -- am fwy o wybodaeth ewch i wefan www.clwbybont.co.uk neu galwch yn y clwb.